koordinuatat: 65.802,31.397
paikka: Piäjärvi, Sohjana
tallendi: Marija Kundozerova, 2016

No šiitä alko uuši kauši, kumpani ei ollun hyövyllini karjalan kielellä. Konša
kylän väki šiirretih Sohjanan košen kyläh, šielä oli erikanšojen ihmisie,
šuurin piirtein, karjalaisien rivillä oli valkovenäläisie ta ukrainalaisie. Ne
oli hakkuamašša meččyä ympäri Piäjärvie; šanakši šanuo, puolet niistä mečistä
oli jiäty hakkuamatta, ta vielä nyt ei ole lahottu veješšä; voisko olla vielä
šuurempua rikošta, mitä on laitettu ympäristöllä ta eläjillä näillä polosilla
mailla karjalaisilla. Ne, tulijat, šuorah šanuo, ruvettih hylkämäh meijän
kieltä, karjuttih kaupašša, esimerkiksi: ”Miksi työ puajitta karjalan kielellä,
myö emmä ymmärrä”. Olisko meilä, karjalaisilla, šanuo, jotta opaštukkua työ iče
puajimah! Ka ei, olima ujot, emmä puoluštan omua kieltä. Myöki, nuoret, aina
vaštasima venäjäkši, konša meiltä kyšyttih vaikka mitä karjalakši. Ka oli šei
kouluissa juuri venäjän kieli!