koordinuatat: 61.43,33.10
naine, roindukohto Mačarvi
tallendi: M. Penttonen, 2016

Mustoituttih Pan'a-buaborukan paginat. "Pie kieli hambahien tagan". "Pure
kieli, gu ei olle putin sanomistu. Sanottu sana hobjaine, sanomatoi -
kuldaine", - nevvoi toiči, konzu rodih himo väčkiä, kielittiä kellegi toizien
lapsien pahoi ruadoloi da tapahtumizii. Kielittiä sezo oli sana, kuduadu buabo
paheksi. - "Toinah ei häi tahtonuh pahua ruadua - käski kengi libo pete
vedi", puolisti babaine joga tostu - lapsii dai vahnembii, a vahnate kummaili
meidy nagrossah, konzu muga puolisti televiizoras nähtylöi ristikanzoi da
kinoloin piähengii. Naizii, suvaičijoi kielitellä toine toizele joga tyhjiä da
vie ližätä midä gi omua liigua, moittie, sanoi kielen kandelijakse,
tret't'uiččijakse. Moizienke ei tahtonuh kai pihal azettu paginale dai sih
taloih istumah kävvä, agu myös toizin paginat kiänetäh - sit puutut viärätöi
viäräkse huigieloih da riidoih. "Moizil kielien plikuttajil ristikanzoil suau
sanuo vai sidä, midä kaikel pihal kirguo. A gu midä et tiedäne toven da
peitosnoidu dieluo ei pie prostota sanomah, gu et tahtone puuttuo kielih kaikel
hierul", selliteli toiči nuorembil. Ei potakoinnuh sentäh tyhjih paginoih,
sudre aijan menetändäh. "Parembi istukkua liigu aigu kois, azukkua midätahto
putillistu pertis libo omal pihal, naizien ruavot loppemattomat ollah", opasti
meidy.